İqlim tədbirləri çərçivəsində uşaqlar diqqət mərkəzində olmalıdırlar və bu mövzu BMT Baş Assambleyasının 79-cu sessiyasında "Yüksək Səviyyəli Həftə" çərçivəsində Nyu-Yorkdakı BMT Uşaq Fondunun (UNİCEF) qərargahında müzakirə edilib.
Trend xəbər verir ki, bu barədə COP29 rəhbərliyinin sosial şəbəkəsində qeyd olunub.
Azərbaycan Respublikasının ekologiya və təbii sərvətlər naziri, COP29-un müəyyən edilmiş Prezidenti Muxtar Babayev və COP29-un İqlim üzrə gənclər çempionu Leyla Həsənova, UNICEF tərəfindən Nyu-Yorkda təşkil edilən dəyirmi masada iştirak ediblər.
M.Babayev bildirib ki, uşaqlar iqlim böhranından ən çox əziyyət çəkənlərdir və onların iqlim tədbirlərinin mərkəzində olması vacibdir.
O vurğulayıb ki, uşaqlar üçün iqlim təşəbbüslərinin maliyyələşdirilməsi və iqlim dəyişikliklərinin təsirlərindən qorumaq üçün dayanıqlı sosial infrastrukturun yaradılması Azərbaycanın COP29 çərçivəsində prioritetidir.
UNICEF-in direktor müavini Kitti Van Der Heijden isə qeyd edib ki, bu, təşkilatın 30 illik tarixində ilk dəfədir ki, iqlim dəyişikliklərinin uşaqlara təsiri kritik proses çərçivəsində müzakirə olunur və buna görə də COP29-un gündəliyinə daxil edilib.
Qeyd edək ki, 11-22 noyabr tarixlərində Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) keçiriləcək.
