İraqın aparıcı universitetlərinin Azərbaycana aid ədəbiyyata ehtiyacı var.

Bu fikri AZƏRTAC-ın müxbiri ilə söhbətində İraqın Kərkük şəhərindən olan tanınmış jurnalist, tədqiqatçı və yazıçı Şəmsəddin Kuzeci bildirib. Onun Azərbaycan haqqında kitabları Ankaradakı Qazi Universitetində təqdim olunub.

Kuzeci bildirib ki, iraqlılar Azərbaycana müsbət yanaşsalar da, bir çox İraq vətəndaşının Cənubi Qafqaz haqqında kifayət qədər məlumata malik olmadığı faktını da qeyd etmək lazımdır. O əlavə edib ki, ədəbiyyat və digər məlumat mənbələrinin çatışmazlığı açıq-aydın hiss olunur.

Agentliyin həmsöhbəti diqqəti İraqın Bağdad, Mosul, Nəcəf və digər şəhərlərdə fəaliyyət göstərən yeddi aparıcı universitetində türkologiya kafedralarının mövcudluğuna yönəldib.

Kuzeci deyib: “Həmin universitetlərin kitabxanalarına Azərbaycan dilində kitablar verilmir. Türkiyə vaxtaşırı bu şöbələrə kitablar bağışlayır, Azərbaycan haqqında ədəbiyyat isə kifayət qədər deyil. Nəticədə türkşünaslıq ixtisası üzrə təhsil alan tələbələr Türk dünyasını təkcə Türkiyə prizmasından qəbul edirlər”.

Kərküklü ziyalı diqqətə çatdırıb ki, rəhbərlik etdiyi Kərkük Türkmən Mədəniyyət Dərnəyi əvvəllər Azərbaycan Milli Elmlər Akademiyası ilə İraqa məhdud sayda çap nəşrinin göndərilməsinə icazə verən protokol imzalayıb, lakin bu, yetərli deyil.

“Bu gün Ankaradakı İraqdakı Kərkük Universitetinə göndəriləcək yeni kitab dəsti ayırdığına görə Azərbaycan səfirliyinin nəzdində fəaliyyət göstərən Azərbaycan Mədəniyyət Mərkəzinə minnətdaram. Lakin bu, yalnız bir universitetdir. Daha böyük təşəbbüslərə ehtiyac var”, - deyə son onilliklərdə Azərbaycana 28 dəfə səfər edən yazıçı qeyd edib. O, iki ölkə xalqlarını birləşdirən dərin tarixi və mədəni əlaqələri vurğulayaraq bildirib ki, bu məsələ ilə bağlı Azərbaycanın rəsmi strukturlarından dəstək alacağına ümid edir.