Azərbaycan Texniki Universitetinin (AzTU) rektoru Vilayət Vəliyev Çinin Quançjou şəhərində keçirilən XII Beynəlxalq İxtiralar Sərgisində (The 12th International Exhibition of Inventions (IEI 2026) Azərbaycanı uğurla təmsil edən tələbələrlə görüşüb.
Tələbələri təbrik edən rektor onların yarışla bağlı təəssüratlarını öyrənib. Bildirib ki, 29 ölkə nümayəndəsinin iştirak etdiyi, 3700-dən çox yerli və beynəlxalq ixtira və innovasiya layihəsinin təqdim olunduğu sərgidə AzTU tələbələrinin iki qızıl və bir gümüş medal qazanması qürurverici hadisədir. Rektor vurğulayıb ki, bu nəticə Azərbaycan gənclərinin elmi və texnoloji potensialının beynəlxalq səviyyədə nümayiş etdirilməsi baxımından mühüm göstəricidir.
IEI 2026-da uğur qazanan AzTU tələbələri – magistratura səviyyəsində təhsil alan Səfərəli Səfərli, Telman Məmmədov və Zaman Səfərov, həmçinin bakalavriat səviyyəsində kompüter mühəndisliyi ixtisasında təhsil alan Mirvaqif İbrahimzadə onlara göstərilən diqqət və dəstəyə görə təşəkkürlərini bildiriblər.
Tələbələr qeyd ediblər ki, beynəlxalq sərgidə təqdim etdikləri üç innovativ layihənin hər birinin münsiflər heyəti tərəfindən medala layiq görülməsi onlar üçün sevinc və motivasiya mənbəyidir.
Görüş zamanı növbəti intellektual yarışlara hazırlıqla bağlı fikir mübadiləsi aparılıb.
