Dünya Bankı Qrupu Azərbaycanla yeni Ölkə Tərəfdaşlıq Çərçivəsinin əsas istiqamətlərini açıqlayıb

Dünya Bankı Qrupunun (DBQ) Direktorlar Şurası bugün Azərbaycanla yeni Ölkə Tərəfdaşlıq Çərçivəsini (ÖTÇ) müzakirə etmişdir. ÖTÇ növbəti beş ildə ölkə ilə strateji münasibətlərin istiqamətlərini müəyyənləşdirir və Azərbaycanın daha rəqabət qabiliyyətli, daha yaşıl və inklüziv iqtisadiyyata keçidini və ölkənin qarşısında duran əsas inkişaf çağırışlarının öhdəsindən gəlməyi dəstəkləyəcək.

Dünya Bankı Qrupundan Trend-ə verilən məlumata görə, bu strategiya iki yüksək səviyyəli nəticəyə fokuslanıb: məhsuldarlığın artırılması və daha yaxşı məşğulluq və iqtisadiyyatın dayanıqlığı və dözümlülüyünün artırılması. Məxsusən, ÖTÇ Azərbaycanda aşağıdakıları dəstəkləyəcək:

• Biznes mühitinin təkmilləşdirilməsi və daha çox və daha yaxşı məşğulluq imkanları, o cümlədən, iş yerlərinin yaradılmasına və mikro, kiçik və orta sahibkarlığın inkişafına dəstək, davamlı və yaşıl maliyyəyə diqqət yetirməklə maliyyə resurslarına çıxışın genişləndirilməsi, qadın sahibkarlara və həssas qruplara dəstək vasitəsilə inklüzivliyin təşviq olunması.
• Nəqliyyat və rəqəmsal bağlantıların gücləndirilməsi, o cümlədən, ticarət və tranzit üçün Orta Dəhlizin inkişaf etdirilməsi, rəqəmsallaşdırma və rəqəmsal bağlantıların təkmilləşdirilməsi, süni zəka kimi yeni texnologiyaların tətbiqinin təşviq olunması.
• Bərpaolunan energetikaya keçidin sürətləndirilməsi, o cümlədən, enerjinin ötürülməsi infrastrukturunun güclədirilməsi, bərpaolunan energetika layihələrinə, batareya saxlanclarına özəl investisiyaların cəlb olunması və yaşıl energetika dəhlizlərinin təşviq olunması.
• İqlim dəyişmələrinə uyğunlaşmanın genişləndirilməsi, o cümlədən, yaşıl binalar da daxil olmaqla iqlim dəyişmlərinin təsirinə dözümlü şəhər ekosistemləri, iqlim baxımdan ağıllı kənd təsərrüfatı praktikaları, habelə özəl sektorun iştirakı da daxil olmaqla su təhlükəsizliyi və səmərəliliyi.

“Bu ÖTÇ Azərbaycanın daha dayanıqlı və firavan gələcəyə doğru transformasiyasını dəstəkləmək öhdəliyimizi əks etdirir”, - Dünya Bankının Azərbaycan üzrə ölkə meneceri Stefanie Stallmeister demişdir. “Əminik ki, tərəfdaşlığımız Azərbaycana iqtisadi potensialını tam şəkildə reallaşdırmağa kömək edəcək”.

BYİB, IFC və MIGA arasında əməkdaşlıq ÖTÇ-nin məğzini təşkil edir. O, investisiyalar və məsləhət xidmətlərinin kombinasiyası vasitəsilə həyata keçiriləcək. DBQ həmçinin inkişafa təsiri maksimum dərəcədə artırmaq üçün digər inkişaf tərəfdaşları və özəl sektorla sıx işləyəcək.