Bakıda Azərbaycandakı Moskva müəssisələrinin biznes-missiyası çərçivəsində təqdimat sessiyası keçirilib.
Trend xəbər verir ki, Moskva İxrac Mərkəzi (MİM) Bakıda 11-13 mart tarixlərində biznes-missiya təşkil edib.
Biznes-missiya çərçivəsində Moskva şirkətləri sənaye, avtomatlaşdırma və tibb sahəsində qabaqcıl həllər təqdim edəcək, həmçinin məhsul və xidmətlərini nümayiş etdirəcəklər.
Moskva İxrac Mərkəzinin (MİM) baş direktoru Vitali Stepanovun sözlərinə görə, Azərbaycan bazarı regionda fəaliyyətini genişləndirməyə çalışan Moskva müəssisələri üçün mühüm imkanlar yaradır. MİM-in biznes-missiyasında iştirak şirkətlərə təkcə innovativ həllərini təqdim etmək deyil, həm də vacib biznes əlaqələri qurmaq və yerli bazarın fəaliyyət özəlliklərini öyrənmək imkanı verəcək.
Biznes-missiya çərçivəsində Bakıdakı tədbirdə aşağıda göstərilən sahələri təmsil edən aparıcı Moskva müəssisələri iştirak edəcəklər.
- Sənaye avadanlıqları: Şirkətlər kabel və keçirici məhsullardan tutmuş analitik cihazqayırma və qeyri-dağıdıcı nəzarət həllərinə qədər geniş məhsul çeşidi təklif edəcəklər.
- Avtomatlaşdırma və texnologiya: İştirakçılar proseslərin idarə olunması üçün tənzimləyici və kəsici klapanlar da daxil olmaqla innovativ həllərini təqdim edəcəklər.
- Tibb və biotexnologiyalar: Moskva şirkətləri diaqnostika və müalicə üçün qabaqcıl texnologiyalar və innovativ tibbi məmulatlarını nümayiş etdirəcəklər.
