Orta Dəhliz vasitəsilə yük daşımalarının həcmi kəskin artıb, bu da dəhlizə beynəlxalq etimadın gücləndiyini göstərir.
AZƏRTAC xəbər verir ki, bu sözləri Gürcüstanın iqtisadiyyat və davamlı inkişaf naziri Mariam Kvrivişvili BMT Beynəlxalq Dəniz Təşkilatının 34-cü sessiyasında çıxışı zamanı söyləyib.
Onun sözlərinə görə, son illərdə Avrasiyada dəyər zəncirlərinin parçalanması və qiymətlərin artması etibarlı, qarşılıqlı fəaliyyət göstərə bilən və multimodal marşrutlara ehtiyac olduğunu göstərir.
“Məhz bu mühitdə Gürcüstanın inteqrasiya olunmuş multimodal nəqliyyat infrastrukturu – müasir limanlar, genişləndirilmiş dəmir yolu şəbəkəsi və təkmilləşdirilmiş avtomobil yolları – yük daşımalarını sürətləndirir və davamlılığı təmin edir. Avropa, Mərkəzi Asiya və Çini Qara dəniz və Cənubi Qafqaz vasitəsilə birləşdirən Orta Dəhliz qısa müddətdə etibarlı, əvəzedilməz ticarət yolu kimi formalaşıb və qlobal təchizat zəncirləri sabitlik və davamlılığa can atdıqca, onun əhəmiyyəti artır”, - deyə nazir vurğulayıb.
Mariam Kvrivişvili Anaklia dərin dəniz limanı layihəsini xüsusilə qeyd edib: “Layihə ölkənin strateji baxışının fundamental elementi olaraq ötürmə qabiliyyətini artırmaq və yeni regional logistika ekosistemi yaratmaq məqsədi daşıyır. 2025-ci ilin sonuna qədər Gürcüstan limanlarında konteyner daşımalarının həcmi 700 mini keçəcəyi proqnozlaşdırılır. Bu inkişaf beynəlxalq etimadın, şəffaf, əlaqəli nəqliyyat sisteminin göstəricisidir”.
