Energetika Azərbaycan və İspaniya arasında gələcək əməkdaşlığın daha dinamik istiqamətlərindən birinə çevrilə bilər.

Bunu AZƏRTAC-ın saytında yayımlanan “Azərbaycan və dünya” proqramının növbəti buraxılışında ispaniyalı ekspert, Panavropa İttifaqının prezidenti Karlos Uriarte Sançes söyləyib.

Onun sözlərinə görə, Azərbaycan Cənub Qaz Dəhlizi vasitəsilə qaz tədarükləri hesabına Avropanın enerji təminatının diversifikasiyasında mühüm rol oynayır.

Ekspert bildirib ki, ənənəvi enerji resursları ilə yanaşı, bərpaolunan enerji mənbələri sahəsində də əməkdaşlıq üçün böyük potensial mövcuddur. Xüsusilə Günəş və külək energetikası istiqamətlərində ispan şirkətləri ciddi texnoloji təcrübəyə malikdir və birgə layihələrin həyata keçirilməsində iştirak edə bilərlər.

Onun qiymətləndirməsinə görə, belə əməkdaşlığın inkişafı investisiyaların cəlb edilməsi, texnologiyaların ötürülməsi və iki ölkə arasında iqtisadi əlaqələrin genişlənməsi üçün imkanlar açır.