Aprel ayında qlobal neft tədarükü 1,8 milyon barel azalaraq, sutkada 95,1 milyon barel olub. Fevral ayından bəri isə ümumi itkilər gündəlik 12,8 milyon barel təşkil edib.
AZƏRTAC xəbər verir ki, bu barədə Beynəlxalq Enerji Agentliyinin (IEA) aylıq hesabatında deyilir.
Məlumata görə, hesabat ayında Hörmüz boğazının bağlanmasından təsirlənən Körfəz ölkələrindən neft hasilatı münaqişədən əvvəlki səviyyələrdən gündəlik 14,4 milyon barel aşağı olub. Atlantik hövzəsindən daha yüksək istehsal və ixrac bazara müəyyən rahatlıq gətirir. Hörmüz boğazından axınların iyun ayından tədricən bərpa olunacağını nəzərə alsaq, qlobal neft tədarükünün cari ildə orta hesabla 3,9 milyon barel azalaraq sutkada 102,2 milyon barel təşkil edəcəyi proqnozlaşdırılır.
Bildirilir ki, qlobal neft ehtiyatları mart ayında 129 milyon barel, apreldə isə daha 117 milyon barel azalıb. Hörmüz boğazından dəniz ticarətində davam edən fasilələr nəticəsində qurudakı ehtiyatlar aprel ayında 170 milyon barel azalıb, dənizdəki ehtiyatlar isə 53 milyon barel artıb. İqtisadi Əməkdaşlıq və İnkişaf Təşkilatına (OECD) üzv ölkələrin qurudakı neft ehtiyatları 146 milyon barel, qeyri-OECD ölkələrinin ehtiyatları isə 24 milyon barel azalıb.
