Azərbaycan Beynəlxalq İnvestisiya Forumu sadəcə bir tədbir deyildi. Bu forum Azərbaycan üçün, ölkənin vətəndaşı və korporativ vətəndaşı olan hər birimiz üçün vacib platformadır.
AZƏRTAC xəbər verir ki, bu barədə “PAŞA Holdinq”in icraçı direktoru Cəlal Qasımov II Azərbaycan Beynəlxalq İnvestisiya Forumu çərçivəsində "İnsan kapitalına və gələcək bacarıqlara investisiya" mövzusunda keçirilən panel sessiyada deyib.
C.Qasımov qeyd edib ki, əsl boşluq biliyi əldə etməklə həmin biliyi fəaliyyətə çevirə bilmək arasındadır.
“İnsanlar haqqında düşünəndə mən hər zaman 5 təbəqədən baxıram. İlk təbəqə bilik, bacarıqlar, düşüncə tərzi, mühakimə yürütmə və müdriklikdir. Bilirsiniz ki, bilik nəyi bildiyinizin əsasıdır; bacarıqlar bu biliyi mənalı bir şeyə çevirməyə kömək edən vasitədir; düşüncə tərzi dünyaya baxdığımız, baş verənləri necə şərh etdiyimiz prizmadır. Mühakimə yürütmək isə odur ki, məsələni şərh etdikdən sonra qərarlar qəbul etməliyik. Çox vaxt da məlumat natamam olduqda və ya seçimlər tələb olunduqda qərar vermək məcburiyyətində qalırıq. Müdriklik isə əslində budur: “Biz doğru problemi həll edirikmi?, “İndi fokuslanmalı olduğumuz ən vacib şey nədir?" suallarını verməkdir. Çünki bu dünyada nəyəsə fokuslanmaq getdikcə daha da çətinləşir. Biz hər kəsə doğru sualları necə verməyi daha çox öyrətməliyik. Çünki yenə də, hər kəs süni intellektdən danışır, hamımız fərqli alətlərdən istifadə edirik, lakin aldığımız cavabın keyfiyyəti süni intellektə verdiyimiz sualın keyfiyyətindən asılıdır.
Səmimi desək, süni intellekt dövründə bilik artıq adi bir resursa çevrilir. Bu, hələ də vacibdir, insanların biliyi olmalıdır. Artıq bilik əsasında insanları və ya üç nəfəri bir-birindən fərqləndirmək çox çətindir. Bilik asanlıqla əlçatandır, onu tez əldə edirsən. İndi işlərin böyük hissəsini maşınlara həvalə edə bilərik: mətn yazmaq, qeydlər aparmaq, analiz etmək - bütün bu analitik işləri maşınlar edir. Lakin vacib olan və həll etməyimiz, həll yolunu tapmağımız lazım olan məsələ bu düşüncə tərzi məsələsidir. Çünki düşüncə tərzi hər şeyi diktə edir və getdikcə daha çox diktə edəcək. Öz hekayənizi necə qurmağınız, bunu uşaqlara necə izah etməyiniz əslində böyük təsirə malikdir. Düşünürəm ki, bu, təhsilin bir hissəsi ola bilər və olmalıdır. Daha sonra mühakimə yürütmək məsələsi gəlir. Kiminsə mühakimə qabiliyyətini artırmaq üçün ilk növbədə, təhsil vasitəsilə fərqli çərçivələri öyrənə bilərik. Çünki bu çərçivələr qərar qəbul etməyə kömək edir. Lakin bir insanın mühakimə qabiliyyətini həqiqətən inkişaf etdirməsi üçün təcrübə keçməsi lazımdır. Onlara qərar vermək, səhv etmək və sonra bu səhvlərdən öyrənmək şansı verilməlidir”, - deyə C.Qasımov əlavə edib.
