Avropada təbii qaz anbarlarının doluluq nisbəti hazırda 72,4 faizdir.
AZƏRTAC xəbər verir ki, bu barədə “Gas Infrastructure Europe” (GIE) məlumat yayıb. Bu göstərici son 5 ilin eyni dövrü üçün 87 faiz olan mövsümi orta səviyyədən aşağıdır.
Avropa qışdan əvvəl anbarları doldurmağa çalışarkən ehtiyatların mövsümi normalardan aşağı olması, tədarükdə uzunmüddətli fasilələrin bazarı daha da sıxışdıra biləcəyi ilə bağlı narahatlıqlar yaradır.
Analitiklərin fikrincə, istilik mövsümü gözləniləndən daha soyuq başlayarsa, təbii qaza tələbat arta və bu da qiymətlərə əlavə təzyiq yarada bilər.
“Köhnə qitə”də təbii qazın qiyməti də artır. Hazırda Niderlandın TTF habında təbii qazın qiyməti meqavat-saat üçün 74,76 avroya çatıb. Qiymətlərin artmasına Hörmüz boğazı ətrafındakı təhlükəsizlik riskləri səbəbindən Körfəzdən LNG daşınmaları ilə bağlı artan narahatlıqlar təsir edir.
