Asiya ilə Avropa arasında ticarət əlaqələrinin genişləndirilməsi, yükdaşımaların səmərəliliyinin artırılması və alternativ nəqliyyat marşrutlarının inkişafı Azərbaycan ilə Türkiyənin iqtisadi əməkdaşlığında mühüm yer tutur. Bu baxımdan, Orta Dəhlizin imkanlarından daha geniş istifadə olunması xüsusi əhəmiyyət kəsb edir.
AZƏRTAC xəbər verir ki, bunu Türkiyənin Azərbaycandakı səfirliyinin baş ticarət müşaviri Nevzat Bozkurt iqtisadi əməkdaşlığa həsr olunan tədbirdə çıxışı zamanı deyib.
O bildirib ki, beynəlxalq ticarət marşrutlarının şaxələndirilməsi və təchizat zəncirlərinin dayanıqlığının gücləndirilməsi müasir dövrdə ölkələrin iqtisadi təhlükəsizliyi üçün vacib amillərdəndir.
Baş ticarət müşavirinin sözlərinə görə, Azərbaycan, Gürcüstan, Türkiyə və Mərkəzi Asiya ölkələri arasında nəqliyyat-logistika əlaqələrinin inkişafı regionun tranzit potensialını artırmaqla yanaşı, beynəlxalq bazarlara çıxış imkanlarını da genişləndirir: “Dəmir yolları, avtomobil yolları, limanlar və digər nəqliyyat infrastrukturlarının təkmilləşdirilməsi yükdaşımaların daha sürətli və səmərəli təşkilinə şərait yarada bilər”.
Nevzat Bozkurt Orta Dəhlizin inkişafının təkcə tranzit daşımaları deyil, həm də logistika mərkəzlərinin yaradılması, anbar təsərrüfatının genişləndirilməsi və yeni investisiya layihələrinin həyata keçirilməsi baxımından əhəmiyyətini vurğulayıb: “Bu istiqamətdə regional əməkdaşlığın gücləndirilməsi Azərbaycan və Türkiyənin beynəlxalq ticarətdə mövqelərinin möhkəmlənməsinə xidmət edə bilər”.
