“Flydubai” aviaşirkətinin İsrailə uçan təyyarəsini qaçırmağa cəhddə ittiham olunan Həmam əl-Həmmaminin Böyük Britaniyada təhsil aldığı zaman təhlükəsizlik yoxlamasından keçmədiyi bildirilir.
AZƏRTAC “The Telegraph”a istinadla xəbər verir ki, 29 yaşlı Oman vətəndaşı Bukingemşir Yeni Universitetində aviasiya menecmenti üzrə üçillik distant bakalavr proqramında təhsil alıb. Onun dərslərə Omanın paytaxtı Maskatdan onlayn qoşulduğu güman edilir.
Böyük Britaniyada aerokosmik mühəndislik və təyyarələrə texniki xidmət kimi həssas sahələrdə təhsil alan bəzi əcnəbi tələbələr Akademik Texnologiyaların Təsdiqi Sxemi (ATAS) çərçivəsində əlavə yoxlamadan keçirilirlər. Lakin bu sistem yalnız müəyyən magistratura və doktorantura səviyyəli proqramlara şamil olunur. Əl-Həmmami bakalavr proqramında oxuduğu və Böyük Britaniyadan kənarda distant təhsil aldığı üçün bu yoxlamaya cəlb edilməyib.
ATAS sistemi 2007-ci ildə təhlükəsizlik xidmətlərinin terrorçu qrupların Böyük Britaniya universitetlərindəki həssas texnologiya və biliklərə çıxış əldə edə biləcəyi ilə bağlı narahatlıqlarından sonra tətbiq olunub.
Əl-Həmmami “Flydubai”nin Dubaydan Təl-Əvivə uçan reysində ikinci pilot kimi çalışarkən balta ilə kapitana hücum edərək, təyyarəyə nəzarəti ələ keçirməyə cəhddə ittiham olunur. Birləşmiş Ərəb Əmirlikləri hakimiyyəti hadisəni terror aktına cəhd kimi qiymətləndirib. Sərnişinlər və ekipaj üzvləri onun qarşısını alaraq təyyarənin idarəetməsini bərpa ediblər.
Bukingemşir Yeni Universiteti əl-Həmmaminin aviasiya menecmenti üzrə distant proqramı başa vurduğunu, lakin universitetdə pilot hazırlığı keçmədiyini təsdiqləyib.
Bukingem Universitetinin təhlükəsizlik üzrə eksperti, professor Entoni Qliz hesab edir ki, mövcud qaydalardakı bu istisna xarici tələbələrlə bağlı təhlükəsizlik yoxlamalarında boşluq yaradır.
