Müstəqil Dövlətlər Birliyinə (MDB) üzv ölkələrlə Azərbaycan arasında aktiv miqrasiya dinamikası mövcuddur.
AZƏRTAC xəbər verir ki, bunu Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynov MDB-nin iştirakçı dövlətlərinin Miqrasiya Orqanları Rəhbərləri Şurasının 29-cu iclası çərçivəsində jurnalistlərə açıqlamasında deyib.
Onun sözlərinə görə, iclasda müzakirə olunan məsələlər üzv dövlətlərin vətəndaşlarının yerdəyişməsinin asanlaşmasına, qanuni miqrasiyanın təşviqinə gətirib çıxaracaq. "Bugünkü iclasda 2025-2026-ci illər üçün təsisatın tədbirlər planının müzakirəsi, şuranın yeni sədrinin seçilməsi, yeni emblemin təsdiqi, təcrübə mübadiləsi və miqrasiya sahəsində milli miqrasiya qanunvericiliyinə edilən dəyişikliklər haqqında danışılacaq", - deyə V. Hüseynov vurğulayıb.
