Azərbaycan şəhərlərin transformasiyası və əlçatan mənzil təminatında nümunədir.
Bunu WUF13 çərçivəsində Trend-ə açıqlamasında Nizami Gəncəvi Beynəlxalq Mərkəzinin həmsədri İsmail Serageldin deyib.
O bildirib ki, Azərbaycanın dünyanın müxtəlif ölkələrindən gələn nümayəndələri bu geniş forumda qəbul etməsi qlobal mənzil böhranının müzakirəsi, təcrübə mübadiləsi və problemlərin həlli istiqamətində öhdəliklərin yenilənməsi baxımından mühüm əhəmiyyət daşıyır.
O qeyd edib: “Mən düşünürəm ki, Azərbaycan şübhəsiz ki, dünyanın bütün ölkələrindən gələn bu böyük forumu qəbul edib, qlobal mənzil böhranını müzakirə etmək, təcrübələri bölüşmək və bu problemləri həll etmək öhdəliyimizi yeniləmək üçün burada toplayıb. Azərbaycan üçün Şərqlə Qərbin, Şimalla Cənubun görüş yeri olmaq və dünyanın ən yaxşılarını bir araya gətirmək yeni deyil".
O əlavə edib ki, bu, Azərbaycanın mövqeyini və Prezident İlham Əliyevin beynəlxalq səviyyədə rəhbərliyini, həmçinin insanların bu forum vasitəsilə ən yaxşı həllərin tapılacağına olan inamını əks etdirir:
“Hər bir ölkə digər ölkələrin təcrübəsindən öyrənə bilər. Azərbaycan müharibədən sonra yenidənqurma təcrübəsinə malikdir və bu xüsusi əhəmiyyət daşıyır. Biz panel müzakirələrində Bosniyanın da yenidənqurma aparmalı olduğunu eşitdik".
O vurğulayıb ki, ümumilikdə bu təcrübə mövcuddur:
“Daha önəmlisi odur ki, Azərbaycan Bakının necə dəyişdirildiyini, digər şəhərlərin necə transformasiya olunduğunu və müxtəlif gəlir qrupları üçün əlçatan və münasib qiymətli mənzil təminatının necə həyata keçirilə biləcəyini göstərir"
Qadınların rolu ilə bağlı sualı cavablandıran Serageldin qeyd edib ki, o, 1999-cu ildə Dünya Bankı üçün “Social Capital” adlı kitabı həmmüəllif kimi hazırlayıb və insan kapitalı ilə sosial kapital anlayışlarını izah edib: “İnsan kapitalı sizin təhsiliniz, sağlamlığınız və s. kimi sizə yatırılan resurslardır. Əgər siz başqa yerə köçsəniz, bunu özünüzlə aparırsınız. Sosial kapital isə bir cəmiyyəti birləşdirən və onun işləməsini təmin edən əlaqələrdir".
O əlavə edib: “Qadınlar sosial kapitalın formalaşmasında əsas rol oynayan amildir və mikro-maliyyələşdirmə təcrübələri bunu dəfələrlə sübut edib".
