Ankaranın mərkəzində ölkəmizin tarixini və mədəniyyətini təbliğ etmək məqsədi daşıyan çoxmərtəbəli mərkəzin açılması Türkiyədə Azərbaycan həqiqətlərinin təbliğinə sanballı töhfə olardı. Məsələn, Türkiyə paytaxtının sakinləri və qonaqları arasında populyar olan Kızılay rayonunda oxşar bir mərkəz fəaliyyət göstərə bilər ki, bu da diaspor strukturlarının möhkəmlənməsinə töhfə verərdi.
Bu təşəbbüslə AZƏRTAC-a verdiyi müsahibədə Ankaradakı Türk Dünyası Mədəniyyət Mərkəzinin direktoru və “Azaflı” Sosial Yardım və Mədəniyyət Təşkilatının təsisçisi, vəkil Arzuman Azaflı çıxış edib. O, Türkiyədəki soydaşlarımızın maraqlarına verdiyi töhfəyə görə Azərbaycan Diasporuna Dəstək Fondu tərəfindən medalla təltif edilib.
Müsahibimizin sözlərinə görə, belə bir mərkəzdə konfrans zalları, kitabxana, kinoteatr, yeməkxana və ziyarətçilərin Azərbaycanın muzeylərinə və ya ayrı-ayrı bölgələrinə virtual turlara çıxacağı, xalçalar, memarlıq, folklor və daha çox mədəni irs nümunələri haqqında geniş məlumat əldə edə biləcəyi otaqlar ola bilər. A. Azaflı qeyd edib: “Azərbaycanlı tələbələr də burada toplaşıb rəsmi bayramları qeyd edə bilərlər”.
Tovuz rayonundan olan vəkil İstanbul Universitetində hüquq təhsilini başa vurduqdan sonra Türkiyədə qaldığını və iyirmi ildən çoxdur ki, hüquqşünaslıqla məşğul olduğunu, qardaş ölkələr arasında əlaqələrin dərinləşməsinə öz töhfəsini verdiyini bildirib.
Bu gün A. Azaflının rəhbərlik etdiyi strukturların xətti ilə Türkiyə universitetlərində təhsil alan Azərbaycan və digər ölkələrdən olan tələbələrə sosial yardımlar göstərilir, təqaüdlər verir.
Bundan əlavə, Türk dünyasına və xüsusən də Azərbaycana həsr olunmuş konfranslar, simpoziumlar, konsertlər və digər tədbirlər də müntəzəm olaraq keçirilir. “Biz Azərbaycanı, o cümlədən onun mədəniyyətini, incəsənətini, tarixini, musiqisini, rəqsini, qastronomiyasını və digər sahələrini hərtərəfli şəkildə təbliğ etmək üçün əlimizdən gələni edirik. Digər məsələlərə yanaşı, azad edilmiş ərazilərə və Azərbaycanın digər mənzərəli guşələrinə Türkiyədən turist səfərləri təşkil etməyə çalışırıq”, - deyə vəkil bildirib.
A. Azaflı Türkiyədə Azərbaycan həqiqətlərinin təbliğinə ehtiyac olmadığı iddialarını yanlış adlandırıb, qardaş ölkəmizin həyatının bütün sahələrində diaspor təşkilatlarımızın mövqeyinin daha da möhkəmlənəcəyinə ümid etdiyini bildirib. “Türkiyə çox böyük ölkədir və burada hər kəsin Azərbaycan haqqında kifayət qədər məlumatı yoxdur. Buna görə də diaspor nümayəndələri olaraq, ölkəmizin görkəmli oğulları haqqında məlumatları adi vətəndaşlara çatdırmaq üçün bu istiqamətdə yorulmadan və fəal şəkildə çalışmağa borcluyuq”, - deyə o bildirib.
Onun sözlərinə görə, Türkiyənin müxtəlif şəhərlərində Nizami Gəncəvi Mədəniyyət mərkəzlərinin açılması bu istiqamətdə müsbət töhfə olardı: “Məsələn, Ərzurumda Aşıq Ələsgər adına Mərkəz yaradıla bilər ki, bu da Azərbaycanın aşıq sənətinin təbliğinə təkan verərdi. Oxşar ideya İstanbulda da həyata keçirilə bilər”.
A. Azaflı əmindir ki, bu cür layihələrin həyata keçirilməsi Türkiyə cəmiyyətində Azərbaycan haqqında hərtərəfli təsəvvürün formalaşmasına və ölkəmizin düşmənlərinin hiylələrinin qarşısının alınmasına imkan verəcək.
