Çinin Baş naziri Li Çian Tacikistanın Baş naziri Koxir Rasulzodanın dəvəti ilə Şanxay Əməkdaşlıq Təşkilatına (ŞƏT) üzv ölkələrin Hökumət Başçıları Şurasının 25-ci iclasında iştirak etmək üçün Tacikistana rəsmi səfərə gəlib.
AZƏRTAC CCTV-yə istinadla xəbər verir ki, Li Çian Çin və Tacikistanın yaxşı qonşular, dostlar və tərəfdaşlar olduğunu qeyd edib. O, son illərdə ikitərəfli münasibətlərin dinamik şəkildə inkişaf etdiyini və müxtəlif sahələrdə səmərəli əməkdaşlığın hər iki ölkənin xalqlarına maddi fayda gətirdiyini vurğulayıb.
Li Çian iki dövlət başçısının bu ilin may ayında Pekində görüşdüyünü və həmin görüşdə Çin-Tacikistan münasibətlərinin dərinləşdirilməsi planının müəyyən edildiyini xatırladıb. O əlavə edib ki, Çin ənənəvi dostluğu qorumaq, qarşılıqlı faydalı əməkdaşlığı gücləndirmək və hər iki ölkənin inkişafına və tərəqqisinə töhfə vermək üçün Tacikistanla işləməyə hazırdır. Bu, iki ölkənin xalqlarına daha çox fayda gətirəcək.
Çinin Baş naziri bildirib ki, Pekin Bişkek sammitinin nəticələrini həyata keçirmək, Hökumət Başçıları Şurasının qarşıdan gələn iclasının tam uğurunu təmin etmək, əməkdaşlığın müxtəlif sahələrində yeni nəticələr əldə etmək və regiondakı bütün ölkələrin xalqlarının rifahını yaxşılaşdırmaq üçün ŞƏT çərçivəsində birgə iş aparılmasını gözləyir.
