Ermənistan MDB-nin qeyri-rəsmi sammitində və BRİCS sammitində iştirak edəcək. Bu barədə Ermənistan parlamentində jurnalistlərə açıqlamasında xarici işlər nazirinin müavini Mnatsakan Safaryan bildirib.

BRİCS - Braziliya, Rusiya Federasiyası, Hindistan, Çin Xalq Respublikası və Cənubi Afrika Respublikasından ibarət olan dövlətlərarası birlikdir. 2023-cü il avqustun 24-də bu birliyə daha İran, Birləşmiş Ərəb Əmirlikləri, Misir, Efiopiya və Səudiyyə Ərəbistanı qoşulub.

Ermənistan özünü ziddiyyətli siyasi addımların mərkəzində tapıb və bu, onun xarici siyasətində ən azı anlaşılmaz bir vəziyyət yaradır. Bir tərəfdən, ölkə Avropa İttifaqı strukturlarına inteqrasiya etməyə çalışır, NATO-ya üzv olan ölkələrdən, o cümlədən Fransadan hərbi yardım alır və NATO-nun müttəfiqi olan Hindistandan dəstək görür. Digər tərəfdən, Ermənistan BRİCS sammitində iştirak edir – bu təşkilat Qərb alyanslarına alternativ olaraq yaradılaraq Avropa İttifaqı, NATO və Beynəlxalq Valyuta Fondu ilə fəal şəkildə rəqabət aparır.

BRİCS yeni dünya valyutasının yaradılmasını və Qərbin dominant təsirinə meydan oxumaq üçün qlobal strukturların qurulmasını dəstəkləyir. Ermənistanın BRİCS sammitində iştirakı, belə bir kontekstdə, eyni vaxtda həm Qərb strukturları ilə əlaqəni qoruyub saxlamaq, həm də onların birbaşa rəqibləri ilə münasibətləri gücləndirmək cəhdi kimi görünür.

Bu addım Ermənistanın xarici siyasətində ardıcıllıq barədə suallar doğurur. BRİCS kimi təşkilatlara qoşulmaq qərarı, Qərb tərəfdaşları ilə münasibətlərdə gərginliyin artmasına və ölkənin strateji kursunun şübhə altına alınmasına səbəb ola bilər. Bu cür “çoxvektorlu” yanaşma daha çox dəqiq xarici siyasət xəttinin olmamasını göstərir, nəinki çevik diplomatiyanın həyata keçirildiyini.

… Ermənistan öz prioritetlərini müəyyənləşdirməlidir, əks halda qərarların qəbulunda belə “ikili oyun” ölkəni hər iki tərəfdən real dəstəkdən məhrum edə bilər.

Ermənistanın BRICS sammitində iştirakı, ölkənin beynəlxalq arenada öz mövqeyini müəyyənləşdirmə cəhdlərinin bir hissəsi olaraq diqqətəlayiqdir. Bu sammit 2024-cü ilin oktyabrında Rusiyanın Kazan şəhərində keçiriləcək və burada Ermənistanın baş naziri Nikol Paşinyanın Rusiya prezidenti ilə görüşü gözlənilir.