Macarıstan hökuməti hər il bir milyona yaxın turisti cəlb edən, dünyanın ən böyük bioloji aktiv termal gölü olan Heviz gölündəki hamamın bərpasına 381 milyon forint (1 avro = 401 forint) ayırıb.
AZƏRTAC xəbər verir ki, Tikinti və Nəqliyyat Nazirliyinin dövlət katibi Balint Nadın sözlərinə görə, gölün dibindən qalxan qazlar nəticəsində dayaq sütunlarının zədələnməsi səbəbindən obyekt bu il martın 18-də bağlanıb. Vəsaitlər hamamın qısa müddətdə yenidən açılmasına imkan verəcək.
Xəstəxananın və ətraf ərazilərin müasirləşdirilməsi də daxil olmaqla kompleksin və ona bitişik infrastrukturun inkişafına dair uzunmüddətli konsepsiya sentyabrın sonuna kimi hazırlanmalıdır. Nadın sözlərinə görə, tam yenilənməyə bir neçə on milyardlarla forint tələb olunacaq.
Regionun turizm cazibəsini qorumaq üçün müvəqqəti çimərlik pavilyonunun ilin sonunadək tikilməsi planlaşdırılır. Eyni zamanda, gölün ətrafındakı digər obyektlər açıq qalır və ziyarətçilər hətta qışda temperaturu +24 °C-dən aşağı düşməyən müalicəvi termal sulardan həzz almağa davam edirlər.
Ekspertlər bağlanmanın səbəbinin mərkəzi binanın sütunlarını zədələyən aqressiv qazlar olduğunu təsdiqləyiblər. Yeni həll qonaqların təhlükəsizliyini təmin etməli və Hevizin ölkənin əsas müalicə və turizm mərkəzlərindən biri kimi statusunu saxlamalıdır.
