Dövlət Turizm Agentliyinin dəstəyi ilə Azərbaycanın qastroturizm imkanları sentyabrın 26-dan 30-dək İtaliyanın Turin şəhərində keçirilən “Terra Madre Salone del Gusto 2024” qida festivalında təbliğ edilib.

Bu barədə AZƏRTAC-a Dövlət Turizm Agentliyindən məlumat verilib.

Bildirilib ki, Dövlət Turizm Agentliyi və tabeliyindəki Azərbaycan Milli Kulinariya Mərkəzinin nümayəndələrinin iştirakı ilə milli stenddə Böyük Qafqaz Dağları üzrə “Slow Food” səyahət turizm marşrutu, qastronomik turizmdə “Slow Food” turizm modelinin tətbiqi, yerli biomüxtəlifliyin qorunması ilə bağlı görülən tədbirlər haqqında məlumat verilib.

Həmçinin festivalda Ata-baba fındığı, Qafqaz camışından motal pendiri, Qafqaz dağ balı, tərxun şərbəti, gül və nanə suyu, o cümlədən Azərbaycanda yox olmaq təhlükəsi ilə üzləşən 30-dan çox məhsulun adının yer aldığı “Dad Gəmisi” kataloqu əsasında hazırlanan menyu təqdim edilib.