Putin: Birbaşa hücum olarsa, bütün silahların istifadəsi gündəmə gələr

Rusiya Prezidenti Vladimir Putin paytaxt Moskva şəhərində keçirilən Beynəlxalq Valday Diskussiya Klubunun illik toplantısında gündəmə dair qiymətləndirmə apardı. Kalininqradla bağlı Rusiya Xarici İşlər Nazirliyinin bəyanatını və bəzi ölkələrə göndərilən məktublardakı ifadələri dəstəklədiyini bildirən Putin, "Kalininqrad daxil olmaqla Rusiyaya birbaşa hücum olarsa, ölkəmizin malik olduğu bütün silahların istifadəsi məsələsi qaçılmaz olaraq və dərhal gündəmə gələcəkdir. Heç bir ölkəni təhdid etmədik, heç kimi qorxutmuruq. Nə 2029-cu ildə, nə 2030-cu ildə, nə də 2050-ci ildə planlaşdırmırıq, lakin hücumla qarşılaşsaq, cavab vermək məcburiyyətində qalacağıq. Avropa ölkələrinin vətəndaşları bunu açıq şəkildə anlamalı, bizim mövqeyimizlə ölkələrindəki bəzi siyasi rəhbərlərin mövqeyini ayırd etməlidir. Bu gün Rusiyanın malik olduğu silahlar başqa heç kimdə yoxdur. Bu bizim üstünlüyümüzdür," deyə danışdı.

Putin, Ukraynanın Rusiya neft emalı zavodlarına hücum edərək iqtisadiyyata zərər verməyi hədəflədiyini qeyd edərək, "Məqsədlərinə qismən çatdılar. Buna qarşılıq eyni şəkildə cavab verdik. İqtisadiyyatları üçün əhəmiyyətli obyektlərə hücum etməyə başladıq. Bunu biz başlamadıq. Neft və neft məhsullarımıza qarşı qadağalar və sanksiyalar tətbiq olunur. Sığortaya qarşı sanksiyalar var. Sanksiyalar davam edərkən dizelimiz dünya bazarına necə çatacaq? Çata bilməyəcək. Buna qarşılıq bizdən, iqtisadi baxımdan həssas obyektlərinə hücumları dayandırmağımız gözlənilir. Bunun məntiqsiz göründüyünü qəbul edərsiniz. Bu məsələlər qarşılıqlı maraqlar əsasında müzakirə edilə bilər. Dünyanın bütün bölgələrində naviqasiya azadlığının və beynəlxalq dəniz hüququ qaydalarının qorunmasından yanayıq," ifadələrini işlətdi.