Kiyevə Rusiyadan ballistik raket hücumu: 15 ölü, 33 yaralı

Kiyev meri Vitaliy Kliçko sosial media hesabından paytaxtın ballistik raketlərlə hədəf alındığını və zərərin şəhərin Solomyanskyi, Svyatoshynskyi və Darnytskyi rayonlarında cəmləşdiyini açıqladı. Kliçko hücumlarda 15 nəfərin həyatını itirdiyini və 33 nəfərin yaralandığını, ən çox itkinin 8 nəfərlə Solomyanskyi rayonunda qeydə alındığını bildirdi. Kliçko, 18 yaralının müalicəsinin xəstəxanalarda davam etdiyini qeyd etdi.

Hücumların ardından şəhərdəki dağıntının miqyası haqqında məlumat verən Kliçko, Solomyanskyi rayonunda 9 mərtəbəli yaşayış binasının üst mərtəbələrində dağıntı və yanğın baş verdiyini, bir uşaq xəstəxanası və məktəbin zərər gördüyünü bildirdi. Xəstəxana binasının pəncərələrinin qırıldığını və həyətindəki maşınların alovlandığını bildirən Kliçko; Svyatoshynskyi və Darnytskyi rayonlarında isə anbar və qeyri-yaşayış binalarının zərər gördüyünü qeyd etdi. Hücumlar səbəbindən Solomyanskyi və Svyatoshynskyi rayonlarının bir hissəsində elektrik kəsintisi yaşandığı da ifadə edildi.

Hücumda həyatını itirənlərin xatirəsinə şəhərdə yas elan edildiyini bildirən Kliçko, “21 avqust günü Kiyevdə yas günü elan edilmişdir. Bu çərçivədə şəhərdəki bütün ictimai binalarda bayraqlar yarıya endiriləcək və bütün əyləncə tədbirləri qadağan ediləcəkdir” açıqlamasını etdi.

Regionda axtarış-xilasetmə və dağıntıların aradan qaldırılması işlərinin davam etdiyi bildirildi.