İtaliya Milli Araşdırmalar Şurası, 2026-cı ilin yayının ölkədə 1950-dən bəri ən isti yay olaraq qeydə alındığını bildirdi.
İtaliya Milli Araşdırmalar Şurası (CNR), Avropa Orta Müddətli Hava Proqnozları Mərkəzinin (ECMWF) 1950-ci ildən bəri saxladığı temperatur məlumatlarını araşdırdı. Açıqlamada, 2026-cı ilin yayında ölkə üzrə orta temperaturun 24,3 dərəcəyə çatdığı və bu dəyərin 23,6 dərəcə ilə əvvəlki ən yüksək temperatur ortalamasının qeydə alındığı 2003-cü ilin yayını geridə qoyduğu bildirildi.
Məlumatlara görə, yanvar-avqust dövründə temperatur dəyərləri uzun illər ortalamalarının üzərində seyr edərkən, ən yüksək fərq avqust ayında baş verdi. Avqust ayında ölkə üzrə orta temperatur 25,6 dərəcə ölçülərək 1950-ci ildən bəri görülən ən yüksək səviyyəyə çatdı.
'2026 ƏN İSTİ İL OLA BİLƏR'
CNR Bioiqtisadiyyat İnstitutunun tədqiqatçısı Lorenzo Arcidiaco, əldə edilən məlumatların 2026-nın 1950-ci ildən bəri ölçülən ən isti il ola biləcəyinə işarə etdiyini söylədi. Arcidiaco, “İlk dəfə olaraq iyul və avqust ayları ard-arda temperatur rekordu qırdı. Ölkə ərazisinin təxminən 70%-i mövsüm normalarının 1 dərəcə, 40%-i isə 2 dərəcə üzərində temperaturla qarşılaşdı. İsti hava dalğaları xüsusilə kənd təsərrüfatı sahələrini və quraqlıqla mübarizə aparan bölgələri vurdu” ifadələrini işlətdi.
Mütəxəssislər, mövsüm normalarının üzərindəki temperaturla əlaqəli olaraq ölkədə 5 min ilə 7 min əlavə ölüm baş vermiş ola biləcəyinin təxmin edildiyini bildirdi.
MARMOLADA BUZLAĞI REKORD SƏVİYYƏDƏ ƏRİDİ
Həddindən artıq isti dalğaları, Dolomit Dağlarının ən böyük buzlağı olan Marmolada Buzlağında da buz itkisinə səbəb oldu. Padua Universiteti, Veneto Ətraf Mühitin Mühafizəsi Agentliyi və İtaliya Buzlaq Elmi Fondu tərəfindən yayımlanan birgə hesabatda, buzlağın əhatə etdiyi sahənin bir il ərzində 92 hektardan 83 hektara endiyi qeyd edildi.
Padua Universitetindən Mauro Varotto, buzlağın orta hesabla 23 metr incəldiyinə diqqət çəkərək, “Son illərdə müşahidə olunan ərimə meyli daha da pisləşdi. Buzlaq yalnız bir ildə 9 hektar sahə itirdi. Bu yay yaşanan temperaturun təkrarlanması halında, Marmolada Buzlağının ömrü təxminən 10 ilə enə bilər” xəbərdarlığını etdi.
Marmoladada oxşar bir ərimə və kütlə itkisi sonuncu dəfə 2022-ci ildə yaşanmış, isti hava dalğasının ardından baş verən buzlaq çökməsində 11 dağçı həyatını itirmişdi.
