“Söhbət Azərbaycanda Belarus parçasından istehsal edilə biləcək və məsələn, neft emalı müəssisələrində, orduda, gömrükdə və ya tikinti sahəsində istifadə oluna biləcək məhsullardan gedir. Bu gün biz bu məsələlərin bütün spektrini müzakirə etdik və artıq ilk addımları müəyyənləşdirmişik — həm niyyətlər baxımından, həm də mümkün əməkdaşlığın daha da inkişaf etdirilməsi istiqamətində. Həmçinin bizim çini zavodumuzun məhsulları da təqdim olundu. Mən anlayıram ki, bu gün Azərbaycan yüksək turizm potensialına malik ölkədir. Burada işgüzar əlaqələr fəal inkişaf edir, çoxsaylı biznes görüşləri keçirilir. Ölkədə müasir və tarixi otellər, mehmanxanalar, sanatoriyalar çoxdur. Buna görə də restoran və yeməkxana qab-qacağı, həmçinin otel sektoru üçün tekstil də maraq doğurur və yüksək tələbatla qarşılanır. Biz bu istiqaməti də təqdim etdik”, – deyə Tatyana Luqina vurğulayıb.
O, “Belleqprom” konserni və “Azərbaycanın Kiçik və Orta Biznesin İnkişafı Agentliyi ilə əməkdaşlıq haqqında memorandumun imzalandığını xatırladıb.
“Bu sənəd sənaye kooperasiyası, texnologiyaların mübadiləsi, birgə istehsal müəssisələrinin yaradılması və məhsulların hər iki ölkənin bazarlarında təşviqi üçün yeni imkanlar açır. Yəni, qeyd etdiyim kimi, assosiasiya müxtəlif sahələrdə fəaliyyət göstərən müəssisələri birləşdirsə də, biz onun rəhbəri ilə razılığa gəldik ki, yaxın həftələrdə bu biznes icmasının tərkibindən yüngül sənaye sahəsinə aid müəssisələr həm ticarət, həm də istehsal yönümlü olanlar seçiləcək.
Söhbət dəridən, ayaqqabıdan, aksesuar məhsullarından, tekstildən, tikiş istehsalından, eləcə də geyim və ona uyğun məhsulların satışı ilə məşğul olan ticarət obyektlərindən gedir. Belə hədəfli yanaşma bizə daha konkret əməkdaşlıq qurmağa və əməkdaşlığın spesifik formatlarını işləməyə imkan verəcək”, – deyə “Belleqprom”un rəhbəri vurğulayıb.
O bildirib ki, danışıqların nəticəsi olaraq “Moqoteks” müəssisəsi ilə Bakı Tikiş Evi arasında parça tədarükünə dair müqavilə imzalanıb.
Sonda Tatyana Luqina bu ilin oktyabr ayının ilk on günü ərzində ənənəvi milli yüngül sənaye məhsulları sərgisinin keçiriləcəyini elan edib.
“O, Minskdə yenicə açılmış "Belaya Ekspo" beynəlxalq sərgi kompleksində baş tutacaq. Orada sərgilər üçün kifayət qədər geniş sahə mövcuddur və biz Azərbaycan yüngül sənaye nümayəndələrini – bəlkə də vahid stend formatında və ya digər formada görməkdən məmnun olarıq”, – deyə T. Luqina qeyd edib.
