Qara Dəniz Ticarət və İnkişaf Bankı (BTSDB -ing.) Azərbaycanla enerji səmərəliliyi sahəsində əməkdaşlıq imkanlarının öyrənilməsi üzərində iş aparır.
Bunu Trend-ə verdiyi özəl müsahibədə BTSDB prezidenti Serhat Köksal Bakı səfəri çərçivəsində bildirib.
“Yaşıl enerji – prioritet məsələdir. Maliyyə sektorunda işlə yanaşı, bizim bərpa olunan enerji sferasında layihələr var və biz şəbəkələrin müasirləşdirilməsi və enerji səmərəliliyinin artırılması üzrə əməkdaşlıq imkanlarını araşdırırıq”, -deyə o bildirib.
Bakıya səfərini şərh edən Köksal qeyd edib ki, bu səfər Azərbaycanın nəqliyyat infrastrukturu, “yaşıl” enerji və yerli banklar vasitəsilə kiçik və orta sahibkarlığın (KOS) dəstəklənməsi kimi prioritet sahələrdə tərəfdaşlığın dərinləşdirilməsinə yönəlib.
“Biz mövcud əməkdaşlığı gücləndirmək və iqtisadiyyatın şaxələndirilməsi, inkişafına imkan verəcək yeni layihələr üçün zəmin hazırlamaq istəyirik. Artıq “Rabitabank” və “TuranBank” ilə aktiv proqramlarımız mövcuddur və biz Azərbaycan bankları ilə ticarət, maliyyələşdirmə və KOS-un dəstəklənməsi üzrə yeni kredit xətləri hazırlayırıq. Məmnuniyyətlə bildirirəm ki, cari səfərim çərçivəsində iki yeni kredit sazişi imzaladıq: “AzerTurk Bank” ilə 8,5 milyon manat, Bank Respublika ilə 25 milyon manat məbləğində. Azərbaycan KOS-larının maliyyələşdirilməsi üçün bu mexanizmlər şirkətlərə sürətli çıxış, məşğulluğun dəstəklənməsi və şaxələndirmənin təmin olunmasında sınaqdan çıxmış üsuldur”,-dey BTSDB prezidenti aydınlaşdırıb.
O, bankın hazırda “Rabitabank” və “TuranBank” ilə əməkdaşlıq etdiyini, yaxın zamanda isə tərəfdaşlarının sayını “AzerTurk Bank” və “Bank Respublik”a hesabına genişləndirdiyini diqqətə çatdırıb.
