ABŞ və İsrailin İrana hərbi hava hücumları fonunda ölkənin cənub-qərbində yerləşən Xuzistan vilayətinin Mahşəhr rayonunda “Fəcr”, “Recal” və “Əmir-Kəbir” neft-kimya şirkətləri vurulub.

Trend-in məlumatına görə, bunu İranın Xuistan vilayəti valisinin müavini Vəliyulla Həyati yerli mediaya açıqlamasında deyib.

Onun sözlərinə görə, həmin şirkətlərə 3 raketin atılması qeydə alınıb.

Həyati deyib ki, hadisə bir neçə partlayışın baş verməsi ilə nəticələnib. Hücumda ölən və yaralananların olacağı ehtimal edilir. Hadisə yerinə yanğınsöndürmə və xilasedicilər cəlb olunub.

Qeyd edək ki, fevralın 28-də ABŞ və İsrail İrana qarşı hərbi əməliyyatlara başlayıb. Zərbələr ölkənin ən böyük şəhərlərinə, o cümlədən Tehrana endirilib. Ağ Ev hücumu İslam Respublikasından qaynaqlanan raket və nüvə təhdidləri ilə əsaslandırıb. İrana endirilən zərbələr nəticəsində ölkənin ali rəhbəri ayətullah Əli Xamenei və rəhbərliyin bəzi digər əsas fiqurları həlak olub. İranın İnqilab Keşikçiləri Korpusu İsrailə qarşı genişmiqyaslı cavab əməliyyatı həyata keçirdiyini bəyan edib. İran eyni zamanda ballistik raketlər, qanadlı raketlər və pilotsuz uçuş aparatları ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman, Səudiyyə Ərəbistanı və Suriyadakı obyektlərini hədəfə alır.

Münaqişə nəticəsində regionun enerji infrastrukturu və dəniz nəqliyyatı da ciddi risk altına düşüb. Hörmüz boğazı ətrafında təhlükəsizlik gərginliyi səbəbindən dünya bazarında neft qiymətləri kəskin artıb. İran Hörmüz boğazına nəzarəti tam şəkildə özündə saxlayaraq sadəcə lazım bildiyi gəmilərin boğazdan keçməsinə icazə verir.