Beynəlxalq Atom Enerjisi Agentliyi (BAEA) İranda nüvə obyektlərinə qarşı son hücumlar nəticəsində bu obyektlərin hüdudlarından kənara radiasiya sızmasının baş vermədiyini təsdiqləyib.
Trend xəbər verir ki, bu barədə BAEA-nin baş direktoru Rafael Qrossi agentliyin İdarəçilər Şurasının iclasında çıxışı zamanı danışıb.
“Fordodakı yanacaq zənginləşdirmə zavodunda və Arakda inşa olunan ağır su reaktorunun sahəsində heç bir zədə aşkarlanmayıb”, - deyə Qrossi qeyd edib. O əlavə edib ki, Buşehrdəki atom elektrik stansiyası və Tehrandakı tədqiqat reaktoru da son hücumlardan zərər görməyib.
Lakin İsfahandakı nüvə obyektində ziyan qeydə alınıb:
“Cümə günü baş vermiş hücum nəticəsində dörd bina – Mərkəzi Kimya Laboratoriyası, uranın emalı zavodu, Tehrandakı reaktor üçün yanacaq istehsalı zavodu və tikinti mərhələsində olan UF4 metal emalı zavodu – zədələnib”, – deyə o bildirib.
