Aİ Şurasının Prezidenti Antonio Kosta və Avropa Komissiyasının Prezidenti Ursula fon der Leyen Belçikanın paytaxtı Brüsseldə keçirilən Aİ Liderlər Zirvəsindən sonra mətbuat konfransı keçirdilər.

Burada çıxış edən Kosta, “Ukraynaya qarşıdakı 2 il üçün 90 milyard avro təmin etmə qərarını təsdiqlədik. Ukraynaya Aİ büdcəsi tərəfindən dəstəklənən bir kredit təmin edəcəyik. Bu, Ukraynanın təcili maliyyə ehtiyaclarını qarşılayacaq və Ukrayna bu krediti yalnız Rusiya təzminat ödədikdən sonra geri ödəyəcək” ifadələrini işlətdi.

Zirvədə liderlərin Rusiyaya qarşı tətbiq olunan sanksiyaların müddətini uzatma mövzusunda razılaşdığını bildirən Kosta, Moskvanı dialoq prosesinə daxil etməyin yeganə yolunun Ukraynanı güclü etməkdən keçdiyini vurğuladı. Aİ-nin ehtiyac duyulduğu müddətcə Kiyev rəhbərliyinin arxasında olacağını vurğulayan Kosta, “Ukraynaya siyasi və mali dəstəyimiz müharibədə, sülhdə və yenidənqurmada heç vaxt azalmayacaq” qiymətləndirməsində bulundu.

Ursula fon der Leyen isə çıxışında, “Ukraynanın qarşıdakı 2 il üçün təcili maliyyə ehtiyaclarını qarşılamaq məqsədilə bir araya gəldik və bunu başardığımızı deməkdən çox məmnunam” dedi.

Komissiyanın, Kiyevə vəsait təmin etmək adına liderlərin önünə Aİ olaraq bazardan borclanmaq ya da Rusiyanın dondurulmuş varlıqlarını təzminat krediti olaraq istifadə etmək şəklində iki alternativ qoyduğunu xatırladan fon der Leyen, “Üzv ölkələr, Ukraynanı qarşıdakı 2 il üçün kapital bazarlarından 90 milyard avro tutarında Aİ borclanması yolu ilə maliyyələşdirməyi qəbul etdi. Ukrayna krediti Rusiyadan müharibə təzminatı aldıqdan sonra geri ödəyəcək. Bu prosesdə Rusiya varlıqları dondurulmuş qalmağa davam edəcək” ifadələrini işlətdi.