Qətər və Pakistan Xarici İşlər Nazirlikləri danışıqlara dair birgə bəyanat yayımladı. Bəyanatda ABŞ ilə İran arasında imzalanan anlaşmadan sonra İsveçrənin Bürgenstock qəsəbəsində tərəflər və vasitəçi ölkələr Pakistan və Qətərin iştirak etdiyi dördtərəfli danışıqların birinci raundunun başa çatdığı bildirildi. Bəyanatda danışıqların ilk gününün müsbət və konstruktiv bir atmosferdə keçdiyi vurğulandı və texniki danışıqların davam etdirilməsi üçün bir mexanizm yaradılması da daxil olmaqla müxtəlif sahələrdə irəliləyiş əldə edildiyi qeyd olundu.
Bəyanatda tərəflərin vasitəçilik səylərinin siyasi aspektlərini nəzarət etmək üçün yüksək səviyyəli bir komitə qurulması barədə razılığa gəldikləri ifadə edildi. Baş müzakirəçilərin nüvə məsələsi ilə yanaşı sanksiyalarla bağlı komitəyə müntəzəm hesabatlar təqdim edəcəkləri vurğulandı. Bundan əlavə, Hörmüz Boğazından ticarət gəmilərinin təhlükəsiz keçidini təmin etmək məqsədilə hər hansı bir hadisə və yanlış anlaşılmanın qarşısını almaq üçün anlaşma memorandumunun 5-ci bəndində göstərilən müddət ərzində tərəflər arasında bir əlaqə kanalı yaradıldığına diqqət çəkildi.
Anlaşma memorandumunda da qeyd edildiyi kimi Livandakı hərbi əməliyyatların dayandırılmasını təmin etmək məqsədilə yaradılacaq işçi qrupunun iki tərəflə yanaşı Livanı da əhatə edəcəyi bildirildi.
Bəyanatda Bürgenstockdakı texniki danışıqların həftə boyunca davam etməsinin planlaşdırıldığı vurğulandı və vasitəçi ölkələr Qətər və Pakistanın danışıqların yekun bir anlaşma ilə nəticələnməsi üçün səylərini davam etdirəcəkləri qeyd olundu.
