Aİ Fransaya və İspaniyaya yanğın dəstəyi verir
Avropa Komissiyası tərəfindən verilən açıqlamada, Fransada və İspaniyada davam edən meşə yanğınlarının Avropadakı ən böyük təxliyə əməliyyatlarından birinə səbəb olduğu və iki ölkədə 300 mindən çox insanın yerindən edildiyi qeyd edildi. Açıqlamada, Fransada Çexiya, Xorvatiya, Almaniya, Portuqaliya, Slovakiya, İsveç və Türkiyədən 7 təyyarə və 4 helikopterin yerləşdirildiyi vurğulanaraq, təyyarələrin əksəriyyətinin rescEU yanğınsöndürmə donanmasının bir hissəsi olduğu ifadə edildi.
Açıqlamada, bir ölkənin Aİ Mülki Müdafiə Mexanizmi çərçivəsində yardım tələbində bulunması halında tələbin mexanizmə qatılan 37 ölkəyə çatdırıldığına diqqət çəkilərək, iştirakçı ölkələrin imkanları daxilində təyyarə, helikopter, yanğınsöndürmə qrupu, avadanlıq və ya mütəxəssis dəstəyi təqdim etdiyi, Aİ Komissiyasının isə bu dəstəyin koordinasiyasını təmin etdiyi və maliyyələşməsinə töhfə verdiyi bildirildi.
Rəsmilər, Fransada ilin əvvəlindən bəri 98 min hektardan çox ərazinin yandığını, Gironde, Landes və Var bölgələrindəki yanğınların hələ də nəzarət altına alınmadığını qeyd etdilər. İspaniyanın Avila bölgəsindəki meşə yanğınından təsirlənən yaşayış yerlərində də təxliyə işlərinin davam etdiyi bildirildi.
