Praqadakı Azərbaycan Mədəniyyət Evində rəssam Heyran Mustafazadənin “Köklər” adlı sərgisinin açılışı olub.

AZƏRTAC xəbər verir ki, tədbir rəmzi “sülh zəngi”nin çalınması ilə başlayıb. Mədəniyyət evinin direktoru və layihənin kuratoru Leyla Begim vurğulayıb ki, “köklər” mövzusu birbaşa sülh anlayışı ilə bağlıdır: məkan təkcə torpaq deyil, həm də yaddaşın və kimliyin qoruyucusudur. Onun fikrincə, köklərin qorunması sabitlik və dialoq lehinə seçimə çevrilir.

Qadın rəssam bəhs edib ki, sərginin ideyası bir neçə ay əvvəl kuratorla söhbətdə yaranıb. Belə ki, 44 günlük Qarabağ müharibəsi hadisələrinin təsiri ilə Bakıda başlanan və Praqada tamamlanan silsilənin mərkəzi rəsm əsəri ağrı və ümid arasında körpünü simvollaşdırır.

Sərgidə tamaşaçılara “Yeni” silsiləsi – dünyaya gələndən tutmuş məhvə və yenilənməyə qədər insan varlığının yeddi mərhələsini əks etdirən əsərlər nümayiş etdirilib. Klassik rəngkarlıq və abstraksiya qovşağında yaradılmış rəsm əsərləri Əzizə Mustafazadənin caz kompozisiyaları ilə müşayiət olunur.

Açılışda Çexiyanın bədii və akademik ictimaiyyətinin nümayəndələri, diplomatlar, eləcə də Azərbaycan diasporunun üzvləri iştirak ediblər. Qonaqların sözlərinə görə, sərgi incəsənətin müxtəlif mədəni təbəqələri necə birləşdirə və dialoq üçün məkanı yarada biləcəyinə parlaq nümunə olub.

Heyran Mustafazadə oktyabrda sərgiyə müəlliflik ekskursiyası təşkil edəcəyinin anonsunu verib.