Zelenski Rusiyaya atəşkəs reaksiyası: Tək dərdləri Qızıl Meydandakı sükut

Ukrayna Prezidenti Volodimir Zelenski sosial media hesabında etdiyi paylaşımda, Rusiya ordusunun gecə yarısından bəri pilotsuz uçuş aparatları (PUA), raketlər və hava bombaları ilə hücumlar təşkil etdiyini qeyd etdi. Zelenski, “Gecə yarısından səhərə qədər təxminən 100 hücum PUA-sı, əsas cəbhə xətlərində onlarla hücum əməliyyatı və onlarla hava hücumu həyata keçirildi. Xarkov, Sumı, Donetsk və Xerson bölgələrində mülki infrastrukturda ciddi ziyan qeydə alındı. Ukrayna Dəmir Yollarına məxsus lokomotivlərə və infrastruktura hücumlar oldu. Ukraynanın enerji sistemi Rusiyanın daimi hədəfi olaraq qalır” ifadələrini işlətdi.

Rusiyanın 6 may tarixindən etibarən təklif olunan atəşkəsi pozduğunu vurğulayan Zelenski, “Bütün bunlar Rusiyanın atəşkəsi ciddiyə almadığını göstərir. Tək dərdləri Qızıl Meydandakı qısa müddətli sükutdur. Rusiya, Moskvanın bir hissəsində yalnız bir neçə saatlıq sükuta tamamilə məntiqsiz bir şəkildə aludə olarkən insanları öldürməyə davam edir. Biz 6 may gecə yarısından etibarən qüvvəyə minmək üzrə bir atəşkəs təklif etmişdik. Dünən və bu gün Rusiya bu atəşkəsi pozdu” deyə dəyərləndirmə etdi.

Hücumlara cavab verəcəklərini, lakin sülh üçün diplomatiya qapısını da açıq saxladıqlarını bildirən Zelenski, “Rus hücumlarına cavab olaraq, uzunmüddətli sanksiyalarımızı davam etdirəcəyik. Rusiyanın diplomatiyaya yönəlmə istəyinə cavab olaraq, diplomatiya yolunda irəliləyəcəyik. Bu müharibəni sona çatdırmaq üçün konkret addımlara ehtiyacımız var və sülhə yenə də nail olunacaq, bunun üçün çalışırıq. Tək sual, Rusiyanın çılğınlığı üzündən nə qədər vaxt itiriləcəyidir” açıqlamasını etdi.