İspaniyada 68 nəfərin öldüyü qatar qəzasından sonra 3 günlük milli matəm elan edildi

İspaniyanın mərkəzi Toledo vilayətində baş verən qatar qəzasından sonra İspaniya Baş naziri Pedro Sanchez hadisə yerinin yaxınlığında qurulan təcili yardım komanda mərkəzində açıqlamalar verdi. Ən azı 68 nəfərin həyatını itirdiyi hadisədən sonra ölkədə 3 günlük milli matəm elan edildiyini bildirən Sanchez, hökumətin toqquşmaya səbəb olan bütün şərtləri araşdıracağını qeyd etdi. Dəmir yolu təhlükəsizlik sistemlərində bir nasazlıq və ya səhlənkarlıq aşkar edildiyi təqdirdə qəti tədbirlər görüləcəyini vurğulayan Sanchez, "Bu işin sonuna qədər gedəcəyik" dedi.

Ölkə üzrə dərin bir kədər yaşandığını bildirən Sanchez, "Bütün İspaniya matəmdədir" ifadəsini işlətdi. Həyatını itirənlərin ailələrinə başsağlığı diləklərini çatdıran İspaniya Baş naziri; hökumətin prioritetinin qurbanlara və yaxınlarına yardım göstərmək, mümkün qədər çox yaralını xilas etmək, hadisədən təsirlənənlərə tibbi və psixoloji dəstək təqdim etmək olduğunu bildirdi.

Dünən səhər saatlarında paytaxt Madridin təxminən 120 kilometr cənubundakı Toledo vilayətində, Madrid-Sevilla dəmir yolu xətti üzərində baş verən hadisədə, Renfe şirkətinə məxsus yüksək sürətli qatar, xəttdə dayanan Iryo şirkətinə məxsus qatara arxadan çırpıldı. Castilla-La Mancha muxtar idarəsinin başçısı Emiliano Garcia-Page, hadisədə 68 nəfərin həyatını itirdiyini, onlarla insanın da yaralandığını bildirdi. Qəzanın dəqiq səbəbinin müəyyən edilməsi məqsədilə başlanan araşdırma davam edir.